CEAPA esixe aos Ministerios de Educación Cultura e Deporte e de Sanidade, Servicios Sociais e Igualdade, a través dunha carta rexistrada onte 1 de febreiro, que se prohiba, urxentemente, o uso do Panga, Tilapia ou calquera outro peixe similar nos comedores escolares de toda España.
» ler máis
O pasado xoves 26 de xaneiro reunímonos, na EIM A Caracola da Coruña, máis de 30 persoas, representando a 10 entidades diferentes para tratar un tema que nos preocupa a todos: a alimentación responsable na escola.
Mestres, cociñeiros, labregos, productores, asociacións veciñais, representantes de ANPAs, da Federación, CONFAPA Galicia, etc… xuntámonos para poñer a rodar por fin a Plataforma por unha Alimentación Responsable na Escola en Galicia. Sentamos unha base común, uns obxectivos para poñernos a traballar e ¡mans á obra!
Para empezar, revisaremos unha vez máis o actual Decreto de Comedores da Xunta de Galicia, e poñerémonos a traballar na próxima reunión coa Concelleira de Xustiza Social e Coidados da Coruña, Silvia Cameán, tras a súa reunión co Conselleiro de Educación.
Falaremos sobre o colexio proxectado para Novo Mesoiro e a nosa convicción de que todo centro debería contar con cociña propia, máis aínda tratándose dunha nova construcción como é o caso.
Isto non fixo máis que empezar, quédanos moito traballo por diante pero a plataforma arranca con forza.
Onte publicouse no DOG a ORDE do 25 de xaneiro de 2017 pola que se modifica a Orde do 12 de marzo de 2013 pola que se desenvolve o procedemento para a admisión do alumnado en centros docentes sustentados con fondos públicos que impartan ensinanzas de 2º ciclo de educación infantil, de educación primaria, de educación secundaria obrigatoria e de bacharelato reguladas na Lei orgánica 2/2006, do 3 de maio, de educación.
Podedes descargala en pdf facendo clic na imaxe:
CONFAPA Galicia
solicita á Consellaría de Cultura, Educación e Ordenación Universitaria que “dea os pasos necesarios para poñer en marcha un plan conxunto da Administración Educativa e doutras Administracóns implicadas, para que elimine de forma rápida, segura e definitiva calquera material que conteña amianto de todos e cada un dos centros educativos […]”
O pasado luns 23 de xaneiro rexistrouse a solicitude, dirixida ao Conselleiro de Educación -Román Rodríguez González- quedando á espera da súa resposta ou novas sobre o asunto.
10 de Febreiro de 2017. Sala Juanjo Gallo, Deputación Provincial da Coruña.AGALURE, coa colaboración da Deputación da Coruña organiza as II Xornadas sobre adiccións sen sustancia.
Un dos fins sociais desta entidade é precisamente a difusión e sensibilización da sociedade respecto dos problemas asociados á adicción ao xogo ou outras adiccións sen sustancia ou comportamentais as que as nosas fillas e fillos, coas novas tecnoloxías tan a man, poden estar expostos.
A inscripción é de balde ata completar o aforo. O programa das Xornadas é o seguinte:
9:30 – 10:00 Recepción e entrega de material
10:00 – 10:30 Presentación da Xornada:
Autoridades asistentes
Asociación
10:30 – 11:30 Charla coloquio “Adiccións sen sustancia: Ludopatía, compras compulsivas, redes sociais, móbiles”
Intervención de D. José Manuel Recouso Ramos (Psicólogo Clínico de AGALURE)
11:30 – 12:00 Descanso
12:00 – 13:00 Relatorio: “Xogo Responsable”
Intervención de D. Máximo Enrique Gutiérrez Muélledes (Presidente de F.E.J.A.R.)
13:00 – 13:30 Relatorio: AGALURE como instrumento de Prevención. Intervención de D. Gerardo Rodríguez Velo (Secretario Agalure)
13:30 Clausura da Xornada
Dende ’12 meses’ lanzan unha campaña moi especial contra o acoso escolar: se buscan #valientes. O Langui e ‘Coro Encanto’ poñen a música a un videoclip que lanza unha mensaxe directa á testemuña dunha situación de acoso: “Non mires a outro lado e se valente”.
A testemuña é a clave para inclinar a balanza a favor da vítima . O rap é un tipo de música moi directa e combativa, e transmite á perfección a súa mensaxe positiva: Todos podemos ser valentes! Se queres máis información, entra en sebuscanvalientes.com
O pasado luns 16 de xaneiro de 2017 comezaron as obras de retirada da cuberta (e do amianto) no colexio coruñés “CEIP Ramón de la Sagra”.
Onte a ANPA Rasa informaba ás familias e convocaba unha concentración diante dos Novos Ministerios, onde está a Xefatura Territorial de Educación:
“Estimadas familias:
Como sabedes, hoxe comezaron co cambio de cuberta no noso centro. Pola mañá confirmábase que as obras realizaranse co calendario previsto e publicado no taboleiro de anuncios da Anpa e na nosa web.
A retirada da cuberta farase a partir das 16 h sempre que as condicións meteorolóxicas o permitan, como xa anunciaran.
Está prevista a retirada de toda a cuberta agás a correspondente á zona da biblioteca, aula de música e comedor, especialmente sensibles por carecer de forxado.
Informamos de que os servizos xestionados pola Anpa, de madrugadores, comedor e actividades extraescolares, seguen a funcionar do mesmo xeito que o colexio.
Si agradeceriamos, que comuniquedes a non asistencia ao comedor a Arume, para facer unha mellor previsión e evitar tirar a comida sobrante (non se pode doar).
Para aquelas familias que non enviedes aos vosos fillos, durante o periodo que dure a retirada e se publiquen as medicións (calcúlanse unhas dúas semanas) xuntamos o modelo de xustificante de non asistencia para entregar no Rexistro dos Ministerios, facilitado pola Comisión das obras e do que dispoñedes tamén en Ositos para a vosa comodidade. Tedes que levar e entregar os dous modelos por duplicado no Rexistro (unha das copias é para vós). O Rexistro está aberto de 9 a 19 h
Xuntamos tamén para o voso coñecemento o escrito da Valedora do Pobo. Estes documentos están publicados na web da Anpa.
Mañán martes 17 haberá tamén unha concentración diante dos Ministerios de 9 a 10 h. Haberá pancartas, silbatos, megafonía e prensa..estades todos convidados á protesta do Ramón de la Sagra!!
Asimesmo, informamos de que, trala proposta na reunión informativa do pasado venres, decidiuse denunciar o caso na Fiscalía de menores. O escrito será entregado previsiblemente no día de mañá.
Saúdos”
Hoxe a prensa facíase eco das reivindicacións levadas a cabo pola ANPA Rasa do CEIP Ramón de la Sagra:
La Voz de Galicia
La Opinión
El Ideal Gallego
Anexos | Informe Valedora do Pobo
La Voz de Galicia, a través do seu suplemento La Voz de la Escuela, e VIAQUA convocan o III Concurso de fotografía “Galicia, Auga e Literatura” no Programa Prensa-Escuela, curso 2016/2017.
Preténdese que os escolares destaquen pasaxes estelares ou momentos cume das grandes obras da literatura galega nas que estea presente a auga, para realzar o vínculo cos valores esenciais da cultura galega.
Trátase de convocar un concurso de fotografía no que os escolares de Galicia (de educación primaria e secundaria) nos dean a súa visión fotográfica sobre pasaxes estelares ou momentos cume das grandes obras da literatura galega na que estea presente a auga. En concreto, preténdese conseguir unha visión fotográfica que contribúa a concienciar sobre o coidado do medio ambiente e da auga como recurso natural escaso
O prazo de presentación dos traballos finalizará o 5 de maio do 2017
O concurso, aberto a toda a comunidade escolar galega, busca que os alumnos, desde educación infantil ata bacharelato e formación profesional, se familiaricen coa lectura e o manexo do xornal e desenvolvan a súa capacidade de exposición e redacción baseándose en informacións publicadas na edición impresa ou dixital de La Voz de Galicia (Mellor Xornalista Infantil) ou mediante traballos orixinais de elaboración propia (Mellor xornalista Xuvenil)
O prazo de presentación de traballos está aberto ata o día 30 de abril de 2017
Xa está aberto o prazo de inscripción para a campaña de esquí 2017 da Deputación Provincial da Coruña, tedes de prazo ata o 23 de xaneiro para formalizar a inscripción.
Desenvolverase entre o 19 de febreiro e o 31 de marzo, en diversas viaxes á estación invernal de Leitariegos (León) para fomentar a práctica do esquí entre os nenos e nenas dos municipios coruñeses nados entre os anos 2002 e 2006.
Nesta edición participarán un total de 500 rapaces que, como é habitual, estarán repartidos en cinco quendas de cinco días de duración cada unha.
